Concerto no claustro medieval da Catedral de Tui, 21h.
Acceso libre por orde de chegada. Non hai reserva previa.
Apertura de portas 20:45h
Luns, 1 de agosto, 21h
Retratos de muller
Música das vangardas europeas e contemporánea
Guitarra
SAMUEL DIZ
O intérprete e investigador Samuel Diz (Tui, 1986) abre a 16ª edición de Música no Claustro cun concerto de guitarra conformado por obras de compositoras coetáneas a Sonia Delaunay (1885-1979), artista de orixe ucraína que atopou refuxio en Valença do Minho durante a Primeira Guerra Mundial. “Retratos de muller” reflexiona sobre o relato patriarcal da historiografía musical, sobre os éxodos do século XX dende unha perspectiva de xénero, ou sobre os retos e particularidades da recuperación deste repertorio asinado por compositoras como a asturiana María Teresa Prieto (1896-1982), a navarra Emiliana de Zubeldia (1888-1987), ou as madrileñas Rosita García Ascot (1902-2002) e Elena Romero (1907-1996).
Un conxunto de obras e compositoras que neste ano Samuel Diz ten interpretado en concerto no Centro Niemeyer, no Museo de Belas Artes da Coruña, no Festival Internacional de Música de La Mancha ou no Festival Spanien an der Donau de Regensburg (Alemaña), ao que se suma a súa divulgación científica no artigo “A transformación artística de Rosita García Ascot no seu exilio mexicano (1939-1965)” na revista Migraciones & Exilios da AEMIC, ou como profesor do seminario “Salirse del camino: creadoras del exilio republicano español” da UIMP e o CSIC.
Os inicios musicais de Samuel Diz sitúanse no seu Tui natal, onde estudou con Gabriel Silvera e con Tomás Camacho, para continuar a súa formación cos concertistas Alen Garagic, Daekun Jang ou coa guitarrista francesa Gaëlle Solal, con quen finalizou a súa carreira no Conservatorio Superior de Música de Sevilla. Posgrao en Xestión de Empresas da Industria Musical na Universidade Pompeu Fabra de Barcelona e mestrado en Patrimonio Cultural e Museoloxía na Universidade Internacional de Valencia, Samuel Diz compaxina o fomento do festival Música no Claustro cunha carreira artística e de investigación en emblemáticos escenarios como o Palau da Música Catalana ou a Fundación Juan March, e internacionalmente no Harare International Festival of the Arts de Zimbabwe, no Museo de Arte Moderno de México ou nas universidades de Cork (Irlanda) ou Boston e Yale nos Estados Unidos.
Xunto aos seus traballos discográficos sobre á música na Xeración do 27’, entre o que destaca o disco “Memoria de la Melancolía” gravado coa guitarra orixinal de Federico García Lorca, recentemente rexistrou a obra de Gloria Rodríguez Gil (Vigo, 1972) no proxecto audiovisual “Músicas inéditas en Casas literarias” na Casa-Museo Emilia Pardo Bazán da Coruña.
PROGRAMA
Canción de berce (1)
Española (2)
Rosita García Ascot (Madrid, 1902 – 2002)
Euskal kapritxoa (3)
Euskal paisaia (4)
Emiliana de Zubeldia (Salinas de Oro, Navarra, 1888 – Sonora, México, 1987)
Escena de nenos (5)
María Teresa Prieto (Oviedo, 1896 – Cidade de México, 1982)
Tres de xuño, nocturno (6)
Elena Romero (Madrid, 1907 – 1996)
Shalom Aleichem (7)
Gloria Rodríguez Gil (Vigo, 1972)
Fontes das obras:
1.- Edición Piles, 2019 / Arranxo para guitarra de Samuel Diz
2.- Edición Unión Musical Española, 1971
3. / 4.- Fondo Emiliana de Zubeldia do Arquivo Histórico da Universidade de Sonora, México / Revisión de Samuel Diz
5.- Edición Revista Música, 1917 / Arranxo para guitarra de Samuel Diz
6.- Fondo Elena Romero do Arquivo da Fundación Juan March, Madrid / Revisión de Samuel Diz
7.- Edición Dos Acordes, 2012 / Revisión Margarita Escarpa
